Канон святому мученику Уару, глас 8, имый краестрочие:
Умоли, Уаре, за внешния наша роды.

Печатается с исправлениями священноисповедника Афанасия (Сахарова)

Песнь 1
Ирмос: Колесницегонителя фараоня погрузи, / чудотворяй иногда, / моисейский жезл крестообразно поразив /и разделив море, / Израиля же беглеца пешеходца спасе, / песнь Богови воспевающа.
Запев: Святый мучениче Уаре, моли Бога о нас.
Умолен буди, Господи, святым Уаром мучеником и облецися в милость и щедроты. Сия и до ада да излиются, Человеколюбче, по богатному Твоему милосердию и ущедрят о них же (о нем же) просим Тя.
Святый мучениче Уаре, моли Бога о нас.
Мучениче Христов великий, о скорбящих и безпомощных умилися и воспомяни седящих во мраце тьмы безпросвтной, и не остави припадая ко щедрому Господу, дондеже утешит их, богатным своим милосердием.
Слава Отцу и Сыну и Святому Духу.
О роде Клеопатры дивныя умолити возмогл еси, славный страстотерпче. Убо и днесь возможеши свободити от муки нами воспоминаемых (-аго). Аще прилежно о них (нем) ко Господу помолишися: тебе бо ради утешит их Владыка, богатным Своим милосердием.
И ныне, и присно, и во веки веков. Аминь.
Богородичен: Безпомощным благая помощнице, призри от славы Твоея, Владычице, во тьму адову, и виждь беды жалости достойных (-аго) и не престай умоляя Твоего Сына, щедраго Господа и Владыку, дондеже утешит их (его) богатным Своим милосердием.
Песнь 3
Ирмос: Утверждей в начале Небеса разумом / и землю на водах основавый, / на камени мя, Христе, заповедей Твоих утверди, / яко несть свят, паче Тебе, Едине Человеколюбче.
Святый мучениче Уаре, моли Бога о нас.
Лик святых сил небесных подвигни собою на молитву, мучениче, и сотвори дело пречудно, и велико, и честно, и радость подаждь неимущим надежды и утешения (в неверии) умершим, испросив у Господа даровати им прощение и велию милость.
Святый мучениче Уаре, моли Бога о нас.
Изрядный страстотерпче и Христу любимый, увеждь, коль желательна свобода и отрада мучимым. Сице и наших сродников и сущих с ними, неверия ради на вечныя муки осужденных, помяни, да меры не обрящут своим радостям, аще испросиши сим от Господа прощение и велию милость.
Слава Отцу и Сыну и Святому Духу.
Уаре, добропобедный страдальче, милостив буди к нашим молениям, зря утружденных несказанную нужду. И сам от жалости понужден, неотступно молися к Человеколюбцу Владыце, да подаст им прощение и велию милость.
И ныне и присно и во веки веков. Аминь.
Богродичен: Всемирная надеждо, богоприятное селение, наше к Богу примирение, Марие, Владычице, приими прошение сие наше, и не престани моляся к Сыну Твоему и всяческих Господу, да Тебе ради подаст и безнадежным прощение и велию милость.

Господи помилуй (трижды)
Седален, глас 4
Аще молишися за весь мир, Великомучениче, и не престаеши прося всем милости, всяким сущим всеобразным преступникам и люто Владыце досадившим, и непрестанно досаждающим, иже мертвыми делы себе до конца уморившим и ничим же мертвых лучшим, яко во зле же успевающим, тако предстани, страстотерпче, и о наших умерших сродниках. Не отступи моляся и припадая к милующему всех Господу, да простит и помилует во тьме седящих и люте зело огорченных.
Слава Отцу и Сыну и Святому Духу.
Другий седален, глас 3
Радости вечныя насельниче, Уаре великий, дерзая да дерзнеши воспоминати пред Господем о всех жалости достойных наших прародителях. О них же усердным прошением на сострадание к ним тя подвизаем. Тем же припади и помолися, не отринет бо твоего предстательства Владыка, но от безмерныя Своея благостыни преклонен, пошлет преогорченным избавление и велию милость.
И ныне и присно и во веки веков. Аминь.
Богородичен:
Пресветлая Госпоже, от небесных сил воспеваемая, и присно возвеличаемая Мати Царя всяческих! Где убо и когда умножается Твоя слава и величество? Не тогда ли, егда грешных заступаеши, и весь мир молитвами Своими покрываеши? Тем же и еще умножи, Владычице, велелепоту Твою, избавивши теплыми Твоими молитвами от лютых мук наших сродников и с ними ныне воспоминаемых нами, подаждь оным избавление и велию милость.

Песнь 4
Ирмос: Ты моя крепость, Господи, / Ты моя и сила, /Ты мой Бог, Ты мое радование, / не оставль недра Отча, / и нашу нищету посетив, / тем с пророком Аввакумом зову Ти: / силе Твоей слава, Человеколюбче.
Святый мучениче Уаре, моли Бога о нас.
Яко же ты, страстотерпче, любиши всех, верою к тебе прибегающих, тако и молящимся тебе любити тя поспеши. Что бы ино тако умножит желание славити тя, якоже дарование просимыя милости скорбящим и всякия отрады лишенным вечным узником? Тем же, о доблий, не престани о сих моляся.
Святый мучениче Уаре, моли Бога о нас.
Зима люта, и спасения безплодие облежит в нечестии умерших, и плач безотраден. С ними убо суть нами воспоминаемыя. Ты же, страстотерпче, яко же о роде Клеопатры дивныя, тако и о сих потщися, и не оскудей о них моляся.
Слава Отцу и Сыну и Святому Духу.
Адова мрачная темница да не обымет во веки прародителей и сродников наших, и всех, их же воспоминаем с ними в нашем разуме, тебе, дивнаго страдальца, молим, и сим, яко же Клеопатрину роду, ослабу просити не оскудей, доблий Уаре мучениче.
И ныне и присно и во веки веков. Аминь.
Богородичен: Тобою, Пречистая, славити всех Содетеля и Спаса величати навыкохом. И Тя, Богородицу, хвалим, и Тебе покланяемся и молим: помилуй в неверствии умерших наших сродников, им же ослабу просити не престани, к Сыну Твоему моляся.
Песнь 5
Ирмос: Вскую мя отринул еси / от лица Твоего, Свете незаходимиый, / и покрыла мя есть чуждая тьма, окаяннаго, / но обрати мя и к свету заповедей Твоих / пути моя направи, молюся.
Святый мучениче Уаре, моли Бога о нас.
Всяко дарование, мучениче, и всяка милость от Всемилостиваго Господа изливаемая аще и предивны и чудесны суть, но превосходит вся прощение в нечестии умерших. Тем потщися, мучениче, Владыку умолити и днесь сия сотворити.
Святый мучениче Уаре, моли Бога о нас.
Не отвратися, Господи, от нашего смирения и не помяни множество грехов наших, паче же помяни древния Твоя милости, и ради щедрот Твоих, и ради Уара, страдальца добляго, не оскудей в богатстве безмерного Твоего милосердия, но излей милость и прощение нами ныне воспоминаемым.
Слава Отцу и Сыну и Святому Духу.
Есть убо, великомучениче, и достизает человеколюбие Владычне и к сущим в море далече. Тем же предстани и днесь, и припадая умоли Его, еже помиловати умерших наших сродников, и всех сущих с ними, и даровати прощение и велию милость.
И ныне и присно и во веки веков. Аминь.
Богородичен: Предстани, Владычице, нашему изнеможению, и буди в нуждах помогающи нам всюду присно: Ты бо еси христианом надежда и упование. Тем же не отрини наша прошения, но исполни их по неизглаголанной Твоей милости.
Песнь 6
Ирмос: Очисти мя, Спасе, / многа бо беззакония моя, / и из глубины зол возведи, молюся: / к Тебе бо возопих, и услыши мя, / Боже спасения моего.
Святый мучениче Уаре, моли Бога о нас.
Гордыня вражия да не возрадуется в корысть получивши себе наших прародителей и сродников, неверия ради их. Ты же, мучениче, теплыми твоими молитвами, разруши надежду его, умоляя Господа о прощении нами поминаемых и о избавлении их от вечныя муки.
Святый мучениче Уаре, моли Бога о нас.
Начало нашему подвигу Клеопатрина рода прощение. О сем уведевше, дерзаем просити тя о молитве и за поминаемых нами. Не презри, великомучениче, и не отрини наших грешных молитв, но потщися и испроси у Владыки Христа оным прощение и от горьких мук избавление.
Слава Отцу и Сыну и Святому Духу.
Онем, иже неверия ради по кончине во тьме пребывают, и отрады не имеют, ты стастотерпче, дерзновение прием радость отпущения вместо страшного томления от Небеснаго Царя испроси.
И ныне и присно и во веки веков. Аминь.
Богородичен: Которая злоба превозможет Твоя, Владычице, матерния молитвы? Воистину убо, аще предстанеши и днесь моля за сих, о них же припадающе просим Тя, сильна еси испросити оным радостное прощение, и избавление, и велию милость.

Господи помилуй (трижды)
Кондак¸глас 4
Христу последуя, мучениче Уаре, того испив чашу, и венцем мучения увенчався, со ангелы ликовствуя, моли непрестанно о душах наших.
Икос
Воспомяни наша глаголы, светлый жителю небесный, Христов славный великомучениче Уаре, великими твоими старадании непреходимое и светлое покоище приобретый. От неисходной темницы и томления непрестанного и нужды, потщися богоприятными твоими молитвами избавити рабов, милости требующих, за них же молим тя усердно, взывающе: исполни наше прошение, святе, и Христа Бога моли непрестанно о наших сродниках во иноверии скончавшихся и о душах наших.

Песнь 7
Ирмос: Божия снисхождения / огнь устыдеся в Вавилоне иногда, / сего ради отроцы в пещи радованною ногою, / яко во цветнице, ликующе, пояху: / благословен еси, Боже отец наших.
Святый мучениче Уаре, моли Бога о нас.
Яко же Ты, Господи, всем равно просвещаеши солнце благим же и злым, и дождь изобильно изливаеши не токмо праведным, но и неправедным, тако и ныне послушай Уара, Твоего страдальца, и пролей милость до конца оным отчужденным сродником нашим, и всем в иноверии усопшим, человеколюбче.
Святый мучениче Уаре, моли Бога о нас.
Ныне, яко же и прежде, щедр буди, Господи, и яко же о Клеопатре соделал еси, сице и о нас милостиве сотвори, и посли своя щедроты и милосердие к нами поминаемым, источник бо еси милости неисчерпаемый.
Слава Отцу и Сыну и Святому Духу.
Яко же поет пророк милости Твоя, Господи, во веки, тако и мы веруем, яко неоскудны щедроты Твоя и до ныне. Милосердие бо Твое неизмеримо и глубина человеколюбия Твоего непостижима. От сих излей на рабов Твоих, о них же просим, ради мученика Твоего Уара, о Владыко наш.
И ныне и присно и во веки веков. Аминь.
Богородичен: Гору Тя сказует премудрый во пророцех, от нея же камень богородия изыде, им же наше спасение, и из глубин адовых возведение бысть. Тем же, Владычице, возведи и днесь от ада поминаемыя нами, да Тя всемилостивую непрестанно величаем.
Песнь 8
Ирмос: Мусикийским органом согласующим / и людем безчисленным покланяющимся образу в Деире, / три отроцы не повинувшеся, / Господа воспеваху / и славословляху во вся веки.
Святый мучениче Уаре, моли Бога о нас.
Яви древния Твоя милости, Господи, якоже послушал еси иногда святых Твоих и помиловал еси неверныя умершия, тако и днесь сих приводим Тебе на молитву, да прошения их ради ущедриши безславно умерших, ведением и неведением Тебе, владыко, досадивших.
Святый мучениче Уаре, моли Бога о нас.
Агнче Божий, пречистою Твоею кровию нас искупивый, Феклино и блаженного Григория моление услышавый, Мефодия со многими и Макария приемый прошение, отраду и избаву зловерным умершим подавый и Златоустаго о молитве за сих написати подвигнувый, приими убо, Владыко, с ними и славнаго Уара, и их молитвами поминаемых нами прости и помилуй.
Слава Отцу и Сыну и Святому Духу.
Радость нам испроси, великомучениче, возвеселимся бо, аще обрящем твоими молитвами, избавленными от вечных мук наших сродников, всегда бо твою молитву Владыка слышит, и прошения исполняет. Ты же не оскудей о сих и ныне моляся, да тя всегда прославляем.
И ныне, и присно, и во веки веков. Аминь.
Богородичен: Пренепорочная Владычице, дивная и безневестная Мати Царева, обилующая множеством милосердия и щедрот, где инде сия обрящем мы милости ищущии, аще не к Тебе поспешим припадающе. Ты бо поток сладости преизобильный нам родила еси, Преблагословенная.
Песнь 9
Ирмос: Ужасеся о сем Небо, / и земли удивишася концы, / яко Бог явися человеком плотски, / и чрево Твое бысть пространнейшее Небес, / тем Тя, Богородицу, / Ангелов и человек чиноначалия величают.
Святый мучениче Уаре, моли Бога о нас.
О Бозе возможеши, Уаре славный, богоприятными твоими молитвами восприяти и излияти милость оной до конца отчужденным. Той бо един щедр и милосердия источник, и вся Ему возможна, яко Владыце: к Нему же неотступно, страдальче, молися, простити и помиловати нами ныне воспоминаемых.
Святый мучениче Уаре, моли Бога о нас.
Дело соверши предивное, о великомучениче, и славе Твоей прикладно: от Господа прощение, и праведнаго Его гнева пременение испроси огорченным темнаго зловерия ради, нашим прародителям. И сим в горести и во ожидании лютейших сущим, да дарует им Владыка избавление и прощение и да вселит их ослабы, идеже Сам весть прощения положити.
Слава Отцу и Сыну и Святому Духу.
И кое убо чудо явится сего дивнейши, кая слава знаменитейши, и которое милосердие таковаго есть больше, аще ты, мучениче, сжалившися, умолиши милостиваго Господа, отпустити грех нечестия от нас поминаемым, и лютаго томления оных избавити.
И ныне и присно и во веки веков. Аминь.
Богородице: Владычице милостивая и человеколюбивая, и не памятозлобная, приими наше прошение, и ходатайствуй неотступно о милости к милостивому Твоему Владыце: еже помиловати и простити всех, во инославии умерших сродников наших и с ними помянутых, и отпущение им и милость неотъемлему подати во веки.

Ин канон мученика Уара, Иосифово, глас 6, егоже краестрочие: Страсти похваляю Уара, славу великую. 

Ирмос: Яко по суху, пешешествовав Израиль / по бездне стопами, / гонителя фараона / видя потопляема, / Богу / победную песнь / поем, вопияше.
Святый мучениче Уаре, моли Бога о нас.
Явился еси на высоте Христовы Церкве, Уаре, якоже солнце светлое, блистаньми просвещая твоих борений, блаженне, земная исполнения.
Святый мучениче Уаре, моли Бога о нас.
Божественныя любве, всеблаженне, объят сладким рачением, отверглся еси себе и ко всякой муце плотстей устремился еси, крепко подвизався.
Слава Отцу и Сыну и Святому Духу.
Смысленно Божественных подвижник юзами связав себе, страстотерпче, и лестныя разорил еси узы крепким терпением многих мук.
И ныне и присно и во веки веков. Аминь.
Богородичен: Пресущественное Слово во Твоем чреве паче слова вселися и, родився Боголепно, мученическия лики, Чистая, приведе, с нимиже песнословим Тя.
Песнь 3
Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Святый мучениче Уаре, моли Бога о нас.
Вшел еси разумом крепким в мужественныя подвиги, утвердився надеждами будущих благих и мучеников Христовых всемудрыми блаженне, поучении.
Святый мучениче Уаре, моли Бога о нас.
Воинство святых страстотерпец, страждущих законне зря, онех показал еси мужескую крепость, примешаяся многообразным, Уаре, мукам.
Слава Отцу и Сыну и Святому Духу.
В полце священнем, Уаре, яко доблий воин, обрелся еси и ссек множество мужества мечем, мудре, ратным, победами славим.
И ныне и присно и во веки веков. Аминь.
Богородичен: Дево Мати Божия, моего уныния глубочайшую тьму и облаки страстей просвещением, еже в Тебе, молю Тя, благодати, отжени.

Господи помилуй (трижды)
Седален, глас 1
Страсти честных видев мучеников и тех лобзав узы любовию, на высоту востекл еси свидетельства, всечудне, на древе бо повешен, раны претерпел еси, дондеже в руки Господни духа предал еси.
Слава Отцу и Сыну и Святому Духу, и ныне и присно и во веки веков. Аминь.
Упование христиан, Пресвятая Дево, Егоже родила еси Бога, паче ума и слова, непрестанно моли о воспевающих Тя подати оставление грехов наших всех и исправление жития, верою и любовию присно славящим Тя.

Песнь 4
Ирмос: Христос моя сила, / Бог и Господь, / Честная Церковь / Боголепно поет, взывающи, / от смысла чиста, о Господе празднующи.
Святый мучениче Уаре, моли Бога о нас.
Святыми язвами удобряемь, краснейший явился еси, и Богу, Уаре, возлюблен, Венчавшему твой верх, досточудне.
Святый мучениче Уаре, моли Бога о нас.
На кресте, славне, растязаемь и на земли простираемь, лютыя болезни претерпел еси. Тем неболезненную жизнь наследовал еси, веселяся.
Слава Отцу и Сыну и Святому Духу.
Хвалами венчаем Божественныя мученики, яже венча благодать Божественная Божественными увязении, низложших вражия высокая мудрования.
И ныне и присно и во веки веков. Аминь.
Богородичен: От тины страстей, Владычице, возведи, и страстных помышлений, отчуждающих мя Бога Единаго Чистаго, да верою ублажаю Тя.
Песнь 5
Ирмос: Божиим светом Твоим, Блаже, / утренюющих Ти души любовию озари, молюся, / Тя ведети, Слове Божий, / Истиннаго Бога, / от мрака греховнаго взывающа.
Святый мучениче Уаре, моли Бога о нас.
Укрепляешися мановеньми Божественными и неослабная терзания терпиши доблим смыслом, Уаре, растерзая гордаго сердце, злобу соделавшаго.
Святый мучениче Уаре, моли Бога о нас.
Славный мученик, видя отпадающия на землю своя плоти, радовашеся, вечнующая ума светлостию и Божественная воздаяния предпрозирая.
Слава Отцу и Сыну и Святому Духу.
Пою Тя, Господи Боже, и славословлю, и покланяюся, благих сподобляяся, уготованных Тебе возлюбльшим, мученик в стардании тепле зовяше.
И ныне и присно и во веки веков. Аминь.
Богородичен: Явльшися Херувим и Серафим яко воистину святейши, Всенепорочная, вся, верно Тя ныне освящающия, освяти и спаси ходтайством Твоим.
Песнь 6
Ирмос: Житейское море, / воздвизаемое зря напастей бурею, /к тихому пристанищу Твоему притек, вопию Ти: / возведи от тли живот мой, / Многомилостиве.
Святый мучениче Уаре, моли Бога о нас.
Глаголов небрегл еси пребеззаконнаго врага и пламень претерпел еси нестерпимых болезней терпеливно, многостардальне Уаре, молебниче о хвалящих тя верою.
Святый мучениче Уаре, моли Бога о нас.
Не престаше мучитель пребезумный, ранами немилостивно сдробляя тя, дондеже в руки Божия священную твою душу предал еси, добротами просвещшуся подвиг твоих.
Слава Отцу и Сыну и Святому Духу.
Возвысился еси, подобяся на древе Христу, и на том вися, твою душу предал еси Богу, тя венчавающу, старастотерпче, законно доблествовавша.
И ныне и присно и во веки веков. Аминь.
Богородичен: Управи, Владычице, в пучине лютых, обуреваемую всегда смиренную душу мою, и к тихому пристанищу направи, несомненным разумом Тя блажащую.

Кондак, глас 4
Христу последуя мучениче Уаре, Того испив чашу и мучения венцем увязеся, и со Ангелы ликовствуеши: моли непрестанно за души наша.

Песнь 7
Ирмос: Росодательну убо пещь / содела Ангел / преподобным отроком, / халдеи, же опаляющее веление Божие мучителя увеща вопити: / благословен еси, Боже отец наших.
Святый мучениче Уаре, моли Бога о нас.
Просвещена тя подвигов приложеньми, предобрая Клеопатра, Уаре, скутала есть, обретши славу тобою, веры достойну яве, юже показа тепле в твое скончание.
Святый мучениче Уаре, моли Бога о нас.
Изливающи на тя слезы и миры тя честными помазующи, сокрывает тя под землею всечестная жена, погребшаго прелесть лукавую и из гроба блистаньми просвещающа нас.
Слава Отцу и Сыну и Святому Духу.
Не престаяше, преподобне, угождающи тебе Христову угоднику, приснопамятная, дондеже явился еси ходатай ей, мудре, Царствия Небеснаго, егоже сподобися тобою с любезнейшим сыном.
И ныне и присно и во веки веков. Аминь.
Богородичен: Сокрушена мя безчисленными согрешении, Дево, ходатайством Твоим обнови, уврачующи мою душу и слово подающи, вопити: благословена, Яже Бога плотию рождшая.
Песнь 8
Ирмос: Из пламене преподобным росу источил еси / и праведнаго жертву водою попалил еси, / вся бо твориши, Христе, токмо еже хотети: / Тя превозносим во вся веки.
Святый мучениче Уаре, моли Бога о нас.
Матерних послушав, мучениче, молеб, Небесному воинству светло воинствуя, отрока честнаго и твоего неотступна показал еси благославия неизреченным милосердием.
Святый мучениче Уаре, моли Бога о нас.
От Египта тя богатство якоже многоценное принесе, мучениче, разбогатящи многоценными дарми, Клеопатра, целении всю Палестину, любовию тя почитающую.
Слава Отцу и Сыну и Святому Духу.
Веселяся, подвиги твоя совершил еси, воине доблий Вседержителя, и яко победитель от Него венчался еси, Уаре всеблаженне, мучеников великая славо.
И ныне и присно и во веки веков. Аминь.
Богородичен: Грехи прилагаю ко греху и будущаго не боюся Страшнаго Суда: победи, Чистая, души моея ослепление и, мольбою Твоею обративши мя спаси.
Песнь 9
Ирмос: Бога / человеком невозможно видети, / на Негоже не смеют чини Ангельстии взирати: / Тобою бо, Всечистая, явися человеком / Слово воплощенно, / Егоже величающе, / с Небесными вои / Тя ублажаем.
Святый мучениче Уаре, моли Бога о нас.
Крепость низложил еси ратоборца, Божественною яве силою препоясався, страдальче доблий Уаре. Тем тя хвалим, врачевание обильное от твоих мощей, вернии, почерпающе.
Святый мучение Уаре, моли Бога о нас.
Яко свет, яко утро, яко великое солнце в земныя простреся память твоя концы, светоносными просвещающи сияньми твоих честных подвиг вся, прехвальне, и мрак сердец отгонящи.
Святый мучениче Уаре, моли Бога о нас.
С тобою сияюща видевши славою многою своего сына чадолюбивая, всех Бога величаше; тебе же искреннейше, мучениче, славяще, величайшаго предстателя, явственно обогатившися.
Слава Отцу и Сыну и Святому Духу.
Земля, на нейже терпеливейшее тело твое, мудре, лежит, Божественне освятится, но даждь молитвами твоими нам разрешение грехов, жития исправление, Уаре, и всех неудобных избавление.
И ныне и присно и во веки веков. Аминь.
Богородичен: Явлься, Дево, из Тебе Господь, светлаго облака, египетския кумиры всяческой пагубе предаде; множество же страстотерпцев Сего носити сподоби, Сего подражателя честным Его страданием.